Am Morga wennd Sonn überm Münster schdood

Ond Spatza vergnügt send ond sengat

Wenn dr Bertolt sein Bulldog längschd agworfa hot

Ond Kender auf de Gassa romschbrengat

No schdeig i so langsam raus aus am Nescht

Gang zaischt do na wo ma sich Zee butzt ond wäscht

Ond no gang i nondr zur Schual

Zur Volkswerkrealhauptoberschual

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

Em Schualhof do schbilat se Fange ond i

Schbil mit ond ma glotzt me bleed a

Dr Aufsichtsläärer woiß au et reacht wia

Ond ob ma s verantworta ka

Neintklässler schreibat ir Aufsatzheft voll

Ob’d Schual a Snäppchättparty schmeißa soll

Zomendescht fir alle Ulmer Kender

Ond zehntausend andre net mender...

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

Dr Hermann hot Hausaufgab gestig et gmacht

Drom muaß er se dreimol jetzt schreiba

D’ Annette schafft dags, se schafft au bei Nacht

Se will net nomol hocka bleiba.

Dr Dieter wird Doktor, kommt jetzt scho em Frack

Isch abr gsondheitlich selber a Wrack

Er lernt für da Bachelor ond dann für da Master

Hot Angst vor seim Bildungsdisaster

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

Em Läärerzemmer hocket a baar Läärer rom

Der Job wird von Joor zu Joor schwäärer

Dr oine schafts leichter, dr andre wird laut

Ond elle hend Angst vor’m totala Burnout

Ma siet wie so mancher vor dr E-va-lu-a-tion sich duckt

Dr Zoichaläärer isch eh scho verruckt

Sei Fach basst halt et auf da Markt

Auf da freia globala Markt

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

So manchr hot aufgeba en de letzschta Joor

Da Grond darf mr et so laut saga

De Kenda hend Smartfons ond twittrat rom

Do muaß sich so mancher reacht plaga

D‘nuia Kultusdministerin die isch hart drauf

Jagt elleweil a neue Sau durchs Dorf -

- Worom schickt mr d’Kender end Schual

End Volks- Werkreal – Gemeinschafts- Haupt- Oberinklusionsschual?

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

Oiner isch fertig, wird ausgschulat heit

Er war en dr Schual sei ganz Leba

Zscherst war er Schüler, dann hot er schdudiert

Dann hot er selber die Schüler zensiert

Jetzt kümmrat sich andre um Pisa ond Twitter

Er denkt an sein Garta (ond ‘s nächste Gewitter)

Ond wenn er mol wieder übr an Schulhof schlappt

Ka ma höra wia er ganz leise sagt:

Kender wo sender, wo gangatr na

Heit isch dochs Wetter no schee

Schbilat so lang ma no schbila ka

Freiat eich, bald ka ma’s nemme!

Ursprünglicher Text/Musik: Thomas Felder "D'Volksrealhauptoberschual" (Thomas-Felder.de)

Mehrfach modernisiert mit Ulmer Touch: Hermanitou/ AJO